କେନ୍ଦ୍ରାପଡ଼ା ଟାଉନ ହାଇସ୍କୁଲ ଜିଲ୍ଲାର ସର୍ବପୁରାତନ ଶିକ୍ଷାନୁଷ୍ଠାନ ମଧ୍ୟରୁ ଅନ୍ୟତମ ହୋଇଥିଲେ ମଧ୍ୟ ଏବେ ଭିତ୍ତିଭୂମି ଅଭାବ, ଶିକ୍ଷକ ସଙ୍କଟ ଓ ମୌଳିକ ସୁବିଧାର ଅଭାବରେ ଜର୍ଜରିତ। ୧୮୬୩ରେ ମିଡିଲ୍ ଭର୍ଣ୍ଣାକୁଲାର ସ୍କୁଲ ଭାବେ ଆରମ୍ଭ ହୋଇଥିବା ଏହି ଅନୁଷ୍ଠାନ ୧୮୮୩ରେ ଜିଲ୍ଲାର ପ୍ରଥମ ଇଂରାଜୀ ହାଇସ୍କୁଲରେ ପରିଣତ ହୋଇଥିଲା। ବର୍ତ୍ତମାନ ପ୍ରାୟ ୫୦୦ ଛାତ୍ରଛାତ୍ରୀ ପଢ଼ୁଥିବା ବେଳେ ୩୨ଟି ଅନୁମୋଦିତ ଶିକ୍ଷକ ପଦରୁ ମାତ୍ର ୧୬ଟି ପୂରଣ ହୋଇଛି। ପ୍ରଧାନଶିକ୍ଷକ ପଦ ଖାଲି ଥିବାରୁ ଜଣେ ଇନ୍‌ଚାର୍ଜ ଦାୟିତ୍ୱ ନେଇଛନ୍ତି। ୮ଟି କୋଠରୀରେ ପାଠପଢ଼ା ଚାଲୁଥିବା ବେଳେ ୩ଟି ଆସବେଷ୍ଟସ୍ ଛାତ ଥିବା କୋଠରୀ ବିପଦଜନକ। ଅତିରିକ୍ତ ୫ଟି କୋଠରୀ ମଧ୍ୟ ଅସୁରକ୍ଷିତ ଘୋଷିତ ହୋଇଛି। ଖେଳପଡ଼ିଆରେ ବର୍ଷାଦିନେ ୨ରୁ ୪ ଫୁଟ୍ ପାଣି ଜମିଥାଏ। ପରିତ୍ୟକ୍ତ ଘୂର୍ଣ୍ଣିବାତ୍ୟା ଆଶ୍ରୟସ୍ଥଳରେ ଜଙ୍ଗଲ ଓ ସାପ ଉପଦ୍ରବ ରହିଛି। ସମସ୍ୟା ସମାଧାନ ପାଇଁ ସ୍ମାରକପତ୍ର ଦିଆଯାଇଛି।